БИШКЕК, 8-фев. — Sputnik. Жогорку Кеӊештин жаӊы депутаты Айнура Осмонова парламентте ант берди. Бул тууралуу ЖКнын маалымат кызматы кабарлады.
КСДП фракциясынын тизмеси боюнча депутат болгон Айнура Осмонова бүгүн, 8-февралда ант берип, өзүнүн депутаттык ыйгарым укуктарын аткарууга киришти. Ал "Түндүкэлектро" ачык акционердик коомунун башкы директорлугуна дайындалган Искендер Кадыркуловдун ордуна келди.
КСДП фракциясынын тизмеси боюнча депутат болгон Айнура Осмонова
© Фото / секретариат партии СДПК
Жогорку Кеӊештин төрагасы Чыныбай Турсунбеков жалпы депутаттардын атынан Айнура Осмонованы салтанаттуу ант бериши менен куттуктап, анын ишине ийгиликтерди каалады.
Айнура Осмонова жогорку билимдүү. 1993-жылы Кыргыз мамлекеттик университетин "соода экономикасы" адистиги боюнча бүтүргөн. Андан кийин 2002-жылы Эл аралык университетин "юриспруденция" адистиги боюнча аяктаган.
Осмонова депутаттык мандатка ээ болгонго чейин "ЭкоИсламикБанктын" Жалал-Абаддагы бөлүмүн жетектеп турган.
