КАРА-БАЛТА, 8-фев. — Sputnik. Кара-Балта шаарынын мэри дагы шайланбай калды, эми шаардык кеңеш таркап кетиши мүмкүн.
Шаршемби күнү 2016-жылы 11-декарда шайланган жаңы чакырылыштын депутаттары экинчи жолу сессияга чогулуп, калаа башчысын шайлоо маселесин карашмак.
Биринчи жыйында 31 депутаттын 19у гана чогулуп, кворум болбогондуктан шаар башчысы шайланбай калган.
Бүгүн болгон жыйынга 18 депутат гана келди.
Борбордук шайлоо комиссиясынын төрагасынын орун басары Абдыжапар Бекматов мэрди шайлоо үчүн депутаттардын үчтөн эки бөлүгү катышуусу керектигин айткан.
"Азыр депутаттар толук чогулган жок. 31 депутаттын үчтөн экиси 21 болот. Бул жерде болгону 18 гана депутат отурат. Андыктан алар калаа башчысын шайлоо маселесин карай албайт. Бул маселе күн тартибинен алынат", — деди Бекматов.
Ал ошондой эле эки жолу кворум болбой калгандын кесепети кандай болорун айтып берди.
"Эгер депутаттар эки жолу чогулуп, шаар башчысын шайлай албай калса, БШК аймактык шайлоо комиссиясынын протоколдорунун негизинде жергиликтүү кеңешти таратуу боюнча президентке сунуш киргизе алат", — деди ал.
Бекматов жергиликтүү кеңешти таратуу боюнча маселени президент гана чече аларын кошумчалады.
Кара-Балта шаарынын мэри болууга эки талапкер ат салышкан. Алар мээрдин милдетин аткаруучу Данияр Шабданов жана мурдагы шаардык кеңештин депутаты Кубанычбек Жанболотов.
2016-жылы 11-декабрда болгон шайлоодо жергиликтүү кеңешке алты партия өткөн: КСДП (7 мандат), "ЭлАман" (6 мандат), "Элдик-Народная" (6 киши), "Республика — Ата-Журт"(5 мандат), "Акшумкар" (4 мандат) жана "Кыргызстан" (3 мандат).
