Сариев: өлкө президенттигине болгон атаандаштык курч болот

БИШКЕК, 7-фев. — Sputnik. "Ак шумкар" саясий партиясынын лидери, президенттикке талапкерлеригин көрсөткөн Темир Сариев шайлоо олуттуу жана атаандаштык курч болорун Sputnik Кыргызстан агенттигине билдирди.

Ошол эле учурда Сариев кимдер ат салышышы мүмкүндүгүн так айткан жок.

"Көптөгөн партиялар катышабыз деп айтып жатышат. Мындай пикирин парламентте отурган партиялар дагы билдиришүүдө. Эми чечимди ар бири өзү үчүн кабыл алат. Азыр мен так фамилияларды атай албайм, себеби алар көп", — деди Сариев.

Ал ошондой эле боло турчу шайлоо ачык жана ал өз мөөнөтүндө болушу керектигин кошумчалады.

"Бардыгы болушу мүмкүн, ошентсе да ал (шайлоо – ред.) өз убактысында болушу керек. Себеби, бул талапкерлер үчүн эле эмес, кетип жаткан президент үчүн да маанилүү. Анткени бардыгы Конституциянын жана мыйзамдын негизинде өтүшү керек. Ошондо гана эч кандай жемелөө жана талкуулар болбойт. Шайлоонун жыйынтыгы эл өзү таанышы керек", — деди мурдагы премьер-министр.

Белгилей кетсек, 2017-жылы 1-декабрда азыркы өлкө башчы Алмазбек Атамбаевдин президенттик мөөнөтү аяктайт. Өлкө башчысын шайлоо качан болору азырынча так билине элек. 4-февралда "Ак шумкар" партиясы Темир Сариевди президенттикке талапкер катары көрсөткөн.