БИШКЕК, 3-фев. — Sputnik. Жогорку Кеңеште экинчи окууда "Үй-бөлүлүк зомбулуктан коргоону жөнүндөгү" мыйзам долбоору талкууланды. Мыйзамды ишке ашыруу үчүн 25 миллион сомдой каражат керек. Өкмөт анын кабыл алынышына каршы чыгып, каражаттын жок экени жүйө келтирди. Өкмөттүн мындай чечимин айрым депутаттар дагы колдоого алган.
Сурабалдиева жума күнү Ош шаарында үй-бүлөлүк зомбулукка каршы талкуу болорун билдирди. Ага Кыргызстан аялдары форумунун өкүлдөрү да катышарын айткан депутат айым ар бир фракция лидерине аталган жыйынга бирден эркек депутатты жиберүү боюнча кат жолдогонун, бирок эч ким жооп бербегенин баса белгиледи.
"Фракция лидерлеринин бирөө дагы бир эркек депутатты жиберген жок. Бизде үй-бүлөлүк зомбулукка каршы мамиле ушундай… Бир гана саясий талаш-тартыш учурунда гана трибунага чыгып кыйкырып калабыз", — деди ал.
"Биз 25 миллион сом таба албай калдыкпы? Тойго, маараке жана башка нерселерге акча табабыз, ал эми кризистик борборлорду ачканга акча жок. Кыйынчылык башка түшүп турганда бир дагы эркек чыкпайт! Алты фракциянын лидерлери, силер трибунага кызмат бөлүштүрүүдө гана чыгасыңар. Аялдар форумунун төрайымы катары силерди сыйлабай калдым", — деп депутат айым кесиптештерин зекиди.
Ал мыйзам долбоорун колдоого чакырды.
