БИШКЕК, 30-янв. — Sputnik. Түштүк Кореянын парламенти БУУнун мурдагы башкы катчысы Пан Ги Мун мамлекетке президент боло ала тургандыгын билдирди. Бул тууралуу РИА Новости Ренхап агенттигине шилтеме берүү менен жазып чыкты.
Парламенттин иликтөө кызматы БУУнун 1946-жылы чыккан резолюциясын изилдеп, анда башкы катчылыктан кеткен адам мамлекеттик жогорку органдарда иштей албайт деген тыюу жок экенин билдиришти. Маалыматка караганда, документте БУУнун катчылык кызматынан кеткенден кийин жогорку кызматтарды ээлебөө сунуштамасы гана жазылган.
Бириккен Улуттар Уюмунда 10 жыл иштеген Пан Ги Мун Түштүк Кореяга январдын башында кайтып келди. Парламент 9-декабрда өлкөнүн президенти Пак Кын Хеге импичмент жарыялаганына байланыштуу Пан Ги Мун президенттикке талапкерлердин катарында экени айтыла баштаган.
