БИШКЕК, 20-дек. — Sputnik. Тайбокс боюнча дүйнөнүн чемпиону Антонина Шевченко Перу кубогунун тапанча атуу мелдешинде экинчи орунду багындырды. Иш-чараны Тапанча атуу боюнча эл аралык федерация (IDPA) уюштурган. Бул тууралуу КРдин Тайбокс федерациясы билдирди.
Турнир 18-декабрда Перунун борбору Лимадагы Fuerte Oyos Rubio аттуу аскердик машыгуу талаасында болуп өттү. Кыргызстандын спортчусу эркектер менен бирге Sharpshooter классындагы тогуз миллиметрлик Beretta 92 тапанча менен мелдешке чыккан. Жыйынтыгында күмүш медалга ээ болду.
Антонина Шевченко тапанча атуу боюнча турнирлерге 2008-жылдан бери катышып келет. Эки жыл мурун ал аялдар арасында IPSC версиясы боюнча Перунун чемпиону аталган. Ушул жылдын ноябрь айында АКШнын Lion Fight версиясында тайбокс боюнча (муайтай) дүйнөнүн чемпиону титулун ийгиликтүү коргогон.
