БИШКЕК, 11-дек. — Sputnik. Президент Алмазбек Атамбаев Стамбул шаарындагы терактылар көп сандаган курмандыктарга алып келгендигине байланыштуу Түркия президенти Режеп Тайип Эрдоганга көңүл айтты. Бул тууралуу өлкө башчынын маалымат кызматы билдирди.
Белгилей кетсек, ишемби күнү кечинде "Водафон Арена" стадионунун жанында жардыруу болгон. Көп өтпөй полиция дагы бир теракт болгондугун кабарлаган. Алдын ала маалыматтар боюнча жан кечти өзүн жардырган. Каза болгон 29 адамдын 27си полиция кызматкерлери. Ал эми жабыркагандардын саны 166га жеткен.
"Кыргыз эли түрк элинин аза кайгысын тең бөлүшөт жана бардык көрүнүштөгү терроризмди чечкиндүү айыптайт", — деп айтылат мамлекет башчынын телеграммасында.
Президент Алмазбек Атамбаев курман болгондордун үй-бүлөлөрүнө жана жакындарына көңүл айтып, ошондой эле жабыр тарткандардын тезирээк сакайып кетишин каалай тургандыгын кошумчалаган.
