БИШКЕК, 8-дек. — Sputnik. Сузак районунун Беш-Мойнок айылында аялын жана кайындарын өлтүргөн окуяга балдары да күбө болгондугун ИИМдин маалымат кызматы билдирди.
Бул трагедия боюнча Кылмыш кодексинин 97-беренеси (эки адамдан ашык адам өлтүрүү) менен кылмыш иши козголгон. Кылмышка шектүү делген 31 жаштагы адам Өзгөн районунун тургуну, Россиянын жараны экени такталган.
ИИМ билдиргендей, бычак курман болгондордун баарынын көкүрөк тушуна урулган.
"Кылмыш болуп жатканда үйдө балдар болгондуктан, окуянын барына күбө болушкан. Туугандарынын айтымында, аялы күйөөсүнүн ортосунда буга чейин уруш талаш болуп, ал тургай чоң чырга айланып кетчү. Күйөөсүнүн мүнөзү орой болгондуктан аялына кол көтөрчү экен. Айрым билдирүүлөр боюнча аялы буга чейин укук коргоо органдарына кайрылган", — деп жазылат маалыматта.
Иликтөө иштери менен учурда Сузак РИИБ тергөө бөлүмү иш алып барууда.
