БИШКЕК, 5-дек. — Sputnik. WhatsApp белгилүү мобилдик тиркемеси жакынкы арада операциялык системасы эскирген смартфондордо иштебей калат. Бул тууралуу The Daily Mail басылмасы билдирди.
Маалыматка ылайык, декабрдын аягында Android 2.1 жана 2.2, Windows Phone 7, ошондой эле IPhone 3GS / IOS 6 сыяктуу операциялык система менен башкарылган уюлдук аппараттарда тиркеме жеткиликтүү болбой калат.
WhatsApp тиркемесинин жетекчилиги бул нерсени эскирген платформалардын жакынкы арада жаңыланууларды кабыл ала албай турганы менен түшүндүрөт. Программаны иштеп чыккандар түшүнбөстүктөр болбошу үчүн колдонуучуларга заманбап смартфондорго өтүүнү сунушташууда.
Белгилүү сервистин иштеп чыгуучулары колдонуучулардын санын көбөйтүү максатында ай сайын ар түрдүү функцияларды, жаңы жабдыктарды чыгарып келет. Ноябрдын ортосунда тиркеме видео чалуу функциясын тартуулаган. Ага чейин сүрөт тартууга мүмкүнчүлүк берген камеранын функцияларын иштеп чыккан.
