БИШКЕК, 15-ноя. — Sputnik. Instagram социалдык баракчасынын колдонуучулары үчүн онлайн-трансляция функциясы киргизилгенин аталган компаниянын башчысы Кевин Систром Financial Times гезитине берген маегинде билдирди.
"Бизге бул онлайн түрүндө түз алып көрсөтүү функциясы абдан кызык болду. Менин оюмча бул функция биздин долбоорду мындан да күчтүү кылат. Эгер мен жакшы көргөн адамым менен мамилемди оңдогум келсе, видео жөнөтүү ага жакыныраак болуунун бирден бир жолу болуп саналат", — деди Систром.
Компаниянын жетекчисинин айтымында, жаңы функция 500 миллион активдүү колдонуучуну кызыктырып, кармап кала алат. Онлайн трансляция кайсы күнү иштей баштай турганы азырынча тактала элек. Мындай функция Facebook социалдык баракчасына ушул жылдын апрель айында жарык көргөн.
Instagram — акысыз интернет-тиркеме, ал сүрөт жана видеолорду тартууга, аларды электен өткөрүп оңдоого мүмкүндүк берет. Ошондой эле башка социалдык тармактарга жайгаштырууга жол ачат. Instagram колдонуучуларын саны 2016-жылы 500 миллион адамдан ашты.
