БИШКЕК, 24-ноя. — Sputnik. Казакстандын президенти Нурсултан Назарбаев балдарына бийликти мурас катары калтырбай турганын айтып, бийликти өткөрүп берүү жолдору Конституцияда башкача жазылганын Bloomberg журналына берген маегинде билдирген. Бул тууралуу РИА Новости жазды.
"Балдарыма бийликти мурас кылып өткөрүп берүүнү карай элекмин. Бул нерсе биз үчүн эмес… Биздин Конституцияда бийликти өткөрүп берүү жолу башкача жазылган", — деди Назарбаев.
Казак президенти 2020-жылы өтө турган президенттик шайлоого катыша турганын толук айтпастан, бул суроону ачык калтырып койгон.
"2020-жылга чейин мен иштейин, 2020-жылы биз сиз менен жолугабыз", — деди 76 жаштагы президенттикке беш жолу шайланган Казакстандын президенти.
Назарбаевдин улуу кызы Дарига Назарбаева 2016-жылы сенаттын эл аралык, коргоо жана коопсуздук комитетинин башчысы болуп дайындалган. Ал эми экинчи кызы Динара Кулибаева жолдошу Тимур Кулибаев менен Казакстандагы экинчи ири банкты көзөмөлдөшөт. Ал эми кичүү кызы Алия курулуш иштери менен алектенет.
