БИШКЕК, 11-ноя. — Sputnik. Жалал-Абадда жаңгак өстүрүү ишин өнүктүрүү максатында фестиваль өткөнүн аймактык кабарчы билдирди.
Бүгүнкү күндө аталган облуста 850 миң гектар жерди токой ээлесе, анын 40 миң гектарында жаңгак, 32 миң гектар жерине мисте, 1700 гектарда бадам өсөт. Учурда жаңгактын жаңы сортун өстүрүүгө багытталган аракеттер көрүлүп жатканы менен каражаттын тартыштыгынан улам иш солгундай түшкөн.
Фестиваль үчүнчү ирет өткөрүлүп, аймакта өстүрүлүп жаткан жаңгактын уникалдуулугун көрсөтүү, андан жасалган түрдүү азыктарды элге сунуштоо максатын көздөйт.
Фестивалга катышып жаткан "Вега-плюс"ишканасынын жетекчиси Каныбек Айтакалов көргөзмөгө жаңгактын учурда изилденип жаткан сорту да коюлганын белгиледи.
"Бул жаңгактын өзгөчөлүгү анын көлөмүндө. Азыр ага ат да ыйгарыла элек", — деди ишкер.
Ал эми "Агро-Лид" коомдук бирикмесинин жетекчиси Гүлназ Касееванын айтымында, акыркы эки жылдан бери кыргыз жаңгагы чет өлкөгө Кыргызстандын атынан экспорттоло баштаган.
"Буга чейин, мисалы, түркиялык ишкерлер жаңгактын маңызын сатып алып Түркиянын атынан чыгарчу. Мындан ары облуста 200дөн ашык токой пайдалануучуларынын катышуусунда "Кыргыз токой байлыгы" кооперативи уюшулуп, анын негизинде жакынкы жылдардан тартып Голландияга миң тоннага жакын жаңгактын маңызы экспорттоло баштады", — деди ал.
Жалал-Абад облусунда жалпысынан 15 жаңгак чарба жана төрт токойчулук иш алып барат. Мындан тышкары, 16 миңден ашык үй-бүлө токой аянттарын ижарага алып иштетет. Кыргызстан боюнча жаңгактын 300дөн ашуун сорту бар.
