Ал эми Honda Stepwgn үлгүсүндөгү унааны жүк ташуучу машинанын капталына кыпчылып калгандыктан, ичиндегилер чыга албай калышкан. Жабыркагандарга жардам берүү максатында биринчилерден болуп жаш студент балдар барышкан. Элдияр Токтошев жана Манас Мамбеталиев окуя тууралуу Sputnik Кыргызстанга айтып берди.
Жигиттер ошол күнү Бишкектен Ошту көздөй досунун үйлөнүү тоюна бара жатышкан.
"Авария болгон жерге барсак, BMW үлгүсүндөгү унаа КамАЗ алдында калып калыптыр. Ал эми Honda Stepwgn кыпчылып калган экен, унаанын ичинен аялдын жардам сураган үнү укканда дароо жардамга чуркадык. Унаа түтөп жаткандыктан кээ бири артка качып жатышты. Бирок биз корккон жокпуз. Күч кайдан пайда болду билбейбиз, ичине кирип бирден алып чыга баштадык. Унаанын ичине алты адам бар экен. Алгач аялдарды алып чыктык, арасында боюнда бар келин да бар экен. Андан соң эркектерди чыгардык",— дешти Элдияр Токтошев жана Манас Мамбеталиев.
Тоннелдин ичинде эки сааттан ашык болушкан эр жүрөктөр унаанын ичиндеги адамдардын баарын чыгарып, түтөп жаткан машинаны да убагында өчүрүүгө үлгүрүшкөн.
