БИШКЕК, 3-ноя. — Sputnik. Кыргызстандын театрларынын флагманы болгон Токтоболот Абдымомунов атындагы Улуттук академиялык театр 11-ноябрда 90 жылдык мааракесин белгилейт. Бул туурасында аталган театрдан кабарлашты.
"Кыргыз театрларынын баарына башат болуп берген, андан өлкөдөгү азыркы жаштар театры (ТЮЗ), опера балет театры, филармония, облустук театрлар чыккан", — деп айтылат маалыматта.
Юбилей күнү театр жамааты алгач, көзү өтүп кеткен корифей артисттердин "Ала-Арчадагы" көрүстөнүнө барып, элесин эскерип гүл коюшат. Андан соң мааракелик иш-чаралар өтөт.
Бул жайда кезегинде кыргыз театр өнөрүнүн залкарлары – Муратбек Рыскулов, Бакен Кыдыкеева, Сабира Күмүшалиева, Советбек Жумадылов, Насыр Кытаев, Ашыралы Боталиев, Жаманов, Таттыбүбү Турсунбаева дагы башка бир топ залкар таланттар иштеген.
