БИШКЕК, 31-окт. — Sputnik. Голливуд актеру Арнольд Шварценеггер "Вий" тасмасынын "Кытайга саякат: Темир беткаптын сыры" аттуу экинчи бөлүгүндө ойнойт. Бул тууралуу фильмдин продюсери Глеб Фетисовдун маалымат кызматына таянып РИА Новости билдирди.
"Шварценеггер катышкан тасманын бөлүгүн тартуу Кытайда жүрөт. Аны менен бирге Голливуддун дагы бир жылдызы Жеки Чан тартылат", — деп айтылат маалыматта.
Буга чейин картинанын продюсери Алексей Петрухин "Вий-2" тасмасында Синтхун Яо, Лю бир туугандар, Чжан Лансинь (Кытайдын таэквондо боюнча 2004-жылкы чемпиону) сыяктуу кытайдын мыкты актерлору катышарын айткан.
Саякатчы Джонатан Гриндин башкы ролун британ актеру Джейсон Флеминг аткарат ("Карталар, акча, эки тапанча" жана "Көп акча"). Сюжетте Грин Петр Iден Россиянын ыраакы чыгышынын картасын түзүү тапшырмасын алып, Кытайга туш болот.
"Вий 3D" биринчи тасмасы Николай Гоголдун белгилүү повестинин негизинде тартылып, 2014-жылы кышында экранга чыккан. Россия-кытай кинокартинасынын бет ачары 2017-жылдын башында болору күтүлүүдө.
