БИШКЕК, 28-окт. — Sputnik. Бүгүн Гапар Айтиев атындагы көркөм сүрөт музейинде "Кийиз дүйнө — көчмөн руху" аталышындагы көргөзмө өттү.
Кыргыз элинин салттуу маданиятын өнүктүрүү менен алектенип келген "Миң кыял" коомдук фондусунун эки жылдык ишинин жыйынтыгы тартууланган иш-чарада салттуу кийимдердин, улуттук буюм-тайымдардын көргөзмөсү болду.
"Миң кыял" коомдук фондусунун жетекчиси Айдай Асангулованын айтымында, долбоору кѳчмѳн жашоодогу салттуу билимдерди жандандыруу, сактап калуу, ѳркүндѳтүү жана 19-кылымга тиешелүү кыргыздын салттуу кийимдерин кайрадан жаратуу максатын көздөйт.
"Буга чейин "Кийиз дүйнө", "Элечек", "Жаргак", "Калпак жана элечек — кыргыздын салттуу баш кийимдери" сыяктуу долбоорлордун үстүнөн иштеп келдик. Кыргызстан, Борбор Азия мамлекеттери жана Россиянын музейлеринен маалымат, материал чогулттук. Ошол иштин жыйынтыгынын баары ушул көргөзмөдө тартууланды", — деди Асангулова.
Көргөзмөгө келген айтылуу акын Аалы Туткучев, белгилүү дастанчы Өмүрзак Кайыповдор ырдап, аталган иш-чаранын маанилүүлүгүнөн кеп салышты. Ачылышынан соң даректүү тасма тартууланып, улуттук музыканын коштоосунда нукура салттуу кийимдер көрсөтүлдү. Андан соң көрүүчүлөргө сүрөт көргөзмө сунушталып, салттуу ыкмалар боюнча мастер-класстар өткөрүлдү.
