БИШКЕК, 15-окт. — Sputnik. Президент Алмазбек Атамбаев Германиянын азык-түлүк жана айыл чарбасы федералдык министри менен жолугуп, аталган тармак жана ирригация чөйрөсүндө кызматташууну талкуулады. Бул туурасында президенттин маалымат кызматынан кабарлашты.
Мамлекет башчы Германиянын канцлери Ангела Меркелдин Кыргызстанга иш сапарынын жүрүшүндө жетишилген макулдашууга ылайык, Кристиан Шмидт башында турган германиялык өкүлдөр менен жолугушканына кубанганын билдирген.
"Президент Атамбаев жана Федералдык министр Кристиан Шмидт өлкөнүн мүмкүнчүлүктөрүн жана Европа биримдиги Кыргызстанга берген ВСП+ артыкчылыктуу маккамды эске алуу менен айыл чарба чөйрөсүндө кызматташуу боюнча пландарды талкуулашты", — деп айтылат таратылган маалыматта.
Жолугушууга Бундестаг депутаты, Германия социал-демократтар партиясынын мүчөсү Йохан Саатхофф жана Германия Азык-түлүк жана айыл чарба министрлигинин ЕБ саясаты, эл аралык кызматташуу, балыкчылык департаментинин директору Герман Йойб катышкан.
