БИШКЕК, 12-окт. — Sputnik. Өзбекстандын борбордук шайлоо комиссиясы өлкөнүн ички иштер министрлигине шайлоо бюллетендерин жеткирүүдө коопсуздукту сактоого милдеттендирди. Бул тууралуу РИА Новости жазып чыкты.
Өзбекстанда президенттик шайлоо 4-декабрга дайындалган. Өзбекстан эгемендүүлүк алгандан бери аны башкарып келген Ислам Каримов 2-сентябрда каза болгондон кийин президенттин милдети өлкөнүн премьер-министри Шавкат Мирзиёевге жүктөлгөн.
Шайлоого катыша турчу партиялар талапкерлерин 20-октябрга чейин көргөзө алат. Мыйзамга ылайык, президенттик шайлоого бир гана саясий партиялар катыша алат.
Буга чейин өлкөнүн расмий түрдө катталган төрт партиясы жыйын өткөрүп, анда президенттик шайлоого катышуунун шарттары кабыл алынган.
Өзбекстандын либералдык-демократиялык партиясы Шавкат Мирзиёевди көрсөтсө, "Милли тикланиш" ("Улуттук кайра жаралуу") улуттук демократиялык партиясы — парламенттин мыйзам чыгаруу палатасынын төрагасынын орун басары Сарвар Отамурадовду, Өзбекстандын Элдик-демократиялык партиясы — Хотамжон Кетменовду, "Адолат" ("Адилет") социалдык-демократиялык партиясы Наримон Умаровду көрсөткөн. Талапкерлер партиялардын октябрь айында боло турчу жыйынында бекитилет.
