Өзбекстанда президенттикке талапкерлерди көрсөтүү башталды

БИШКЕК, 30-сен. — Sputnik. Өзбекстандагы президенттик шайлоого талапкерлерди көрсөтүүнү саясий партиялар бүгүн баштай турганын РИА Новости билдирди.  

Өзбекстанды дээрдик 30 жыл башкарган Ислам Каримов 78 жашында инсульттан каза болгон. Учурда өлкөнү утурумдук жетекчи премьер-министр Шавкат Мирзиёев башкарып келет. Президенттик шайлоо 4-декабрга белгиленген.

Өлкөнүн Борбордук шайлоо комиссиясынын токтомуна ылайык, талапкерлерди көрсөтүү 30-сентябрдан 20-октябрга чейин уланат. Мыйзамга ылайык, президенттик шайлоого бир гана саясий партиялар катыша алат. 

Буга чейин өлкөнүн расмий түрдө катталган төрт партиясы жыйын өткөрүп, анда президенттик шайлоого катышуунун шарттары кабыл алынган.

Өзбекстандын либералдык-демократиялык партиясы Шавкат Мирзиёевди көрсөтсө, "Милли тикланиш" ("Улуттук кайра жаралуу") улуттук демократиялык партиясы — парламенттин мыйзам чыгаруу палатасынын төрагасынын орун басары Сарвар Отамурадовду, Өзбекстандын Элдик-демократиялык партиясы — Хотамжон Кетменовду, "Адолат" ("Адилет") социалдык-демократиялык партиясы Наримон Умаровду көрсөткөн. Талапкерлер партиялардын октябрь айында боло турчу жыйынында бекитилет.