БИШКЕК, 8-сен. — Sputnik. Өзбекстандын премьер-министри Шавкат Мирзиеев президенттин милдетин убактылуу аткарып турмай болду. Мындай чечимди Өзбек республикасынын парламентинин эки палатасы атайын отурумунда кабыл алганын төмөнкү палатанын төрагасы кабарлаганын Sputnik Өзбекстан сайты билдирди.
Өзбекстандын биринчи президенти Ислам Каримов 78 жашында өткөн жума күнү дүйнө салган.
"Шавкат Мирзиеев бүгүн президенттин убактылуу милдетин аткаруучулукка бекитилди. Ал эми Олий Мажилистин сенатынын төрагасы Нигматилла Юлдашев талапкерлигин алып койду", — деп билдирди агенттикке маалымат булагы.
Жаңы президентти шайлоо жакынкы үч айдын ичинде өтүшү керек. Парламенттин чечимине чейин Баш мыйзам боюнча өлкө президентинин милдетин Өзбекстан сенатынын төрагасы аткарып турушу керек.
Ислам Каримовдун өлүмүнөн кийин өлкө үч күн аза күтүп, сөөгү 3-сентябрда Самарканд шаарындагы Шахи-Зинда көрүстөнүнө алып келинип, ата-энесинин жанына коюлган.
