БИШКЕК, 28-сен. – Sputnik. Улуттук коопсуздук боюнча мамлекеттик комитеттин Кызыл-Кыя боюнча бөлүм башчысы менен жергиликтүү ишкердин ортосундагы чыр-чатакты милиция менен Аскер прокуратурасы да иликтемей болду. Бул тууралуу Sputnik Кыргызстан агенттигине Ош ОИИБ маалымат кызматынын жетекчиси Жеңиш Ашырбаев билдирди.
Эскерте кетсек, "Нива" унаасы менен бараткан УКМК кызматкери Lexus машинасына айдап бараткан ишкер менен жол талашып, мушташа кеткен. Экөө тең ооруканага жаткырылып, укук коргоо органдарына бири-биринин үстүнөн жазылган арыз менен кайрылышкан. УКМК иликтөө иштеринин адилеттүү болушу үчүн аталган кызматкерди иштен убактылуу четтеткен.
"Ишкердин арызын Аскер прокуратурасы карап жатат, анткени күч органдары аталган ведомствонун карамагында. Ал эми УКМК кызматкеринин арызы боюнча Ноокат РИИБи иш алып барууда", — деди Аширбаев.
Анын айтымында, учурда тергөө иштери жүрүп, күбөлөр суралып жатат. Чекисттин жубайы Махидил Сулайманова 24-сентябрдагы окуяны күйөөсүнүн сөзү менен айтып берди.
Ал эми ишкер Зарылбек Мааткалыков аны төрт киши сабаганын айтып, окуядан кийин унаасындагы 156 миң сомдун жоголуп кеткенин билдирген.
