БИШКЕК, 20-сен. — Sputnik. Ош облусуна караштуу Кара-Кулжа районунун борборунда бал фестивалы өткөрүлдү.
Иш-чарага Ош, Баткен, Жалал-Абад жана Нарын облустарынан келген балчылар катышты. Алардын арасында 36 жылдан бери бал өндүргөн Абдыжапар Кудайбердиев дагы бар.
"Жыл сайын үч тонна бал өндүрөм. Менде аарылардын Карпат, Кавказ, Австралия деген бир нече түрлөрү бар. Суук тийип ооруп калганда дарыларды флакон менен чачабыз. Аарылар өтө сезимтал келишет. Алар мас, тер жыттанган, кир адамдарды жактырбайт", — деп билдирди Кудайбердиев.
Ал эми район жетекчиси Каныбек Алиязовдун айтымында, Кара-Кулжадагы 317 миң гектар жайыт жерде бал өндүрүлөт.
"Райондо 10 миң даана бал челек бар. Жыл сайын 300 тоннадан ашуун бал өндүрүлөт. Эми балдын көлөмүн 800 тоннага жеткирүү пландалып жатат", — деп билдирди Алиязов.
Жарманкенин соңунда "эң мыкты балчы", "эң мыкты бал" деген номинациялар боюнча белектер ыйгарылды.
Учурда өлкө аймагында өндүрүлгөн балдар Япония, Россия жана Кытайга дүңүнөн экспорттолуп жатат.
