БИШКЕК, 20-сен. — Sputnik. Кыргызстанда волейбол спортун өнүктүрүү боюнча борбор ачылат. Бул тууралуу Жогорку Кеңештин төрагасынын орун басары Нурбек Алимбеков Дүйнөлүк волейбол уюмдарынын өкүлдөрү менен жолугушуу учурунда билдиргенин парламенттин маалымат кызматы кабарлады.
Аталган жолугушууга Дүйнөлүк волейбол федерациясынын вице-президенти Иса Хамза Альфайлакави, Волейбол боюнча Азия конфедерациясынын баш катчысы Сунил Денг, КРдин Волейбол федерациясынын вице-президенти Жеңишбек Кызалаков, федерациянын катчысы Кылычбек Сарбагишевдер катышты.
Өз кезегинде Алимбаев Кыргызстанда волейбол спорту өнүгүп жаткандыгын айтып, 15-17-сентябрь күнү Чолпон-Ата шаарында өткөн тандоо туру мыкты деңгээлде болгонун белгиледи.
Ал эми Бүткүл дүйнөлүк волейбол федерациясынын вице-президенти Иса Хамза Альфайлакави кыргыз спортчуларынын келечеги кең экенине токтолду.
Белгилей кетсек, 15-17-сентябрь күндөрү Чолпон-Ата шаарында волейбол боюнча дүйнө чемпионатына тандоо туру өтүп, Кыргызстандын командасы кийинки этапка өткөн.
