БИШКЕК, 18-сен. — Sputnik. Кыргызстандын волейбол боюнча курама тобу дүйнөлүк чемпионатка болгон тандоо турунун экинчи этабына өттү. Бул тууралуу аталган спорттун түрү боюнча Федерациянын маалымат кызматынан кабарлашты.
2018-жылы өтө турган чемпионатка тандоо туру Ысык-Көлдүн Чолпон-Ата шаарында Кыргызстан, Мальдив аралдары жана Бангладештин курама топторунун катышуусунда өттү.
15-сентябрда өткөн оюндун биринчи турунда Кыргызстандын курама тобу Бангладешти 3:0 эсебинде жеңип, үч упай топтой алган.
Жыйынтыктоочу оюн 17-сентябрда өтүп кыргызстандыктар Мальдивден келген курама топ менен беттешке чыкты. "Аралдыктар" кыргызстандыктарды үч партияда жеңсе дүйнөлүк чемпионаттын тандоо турунун кийинки этабына өтүүгө мүмкүнчүлүк алышмак.
Тандоо раундунун жыйынтыгында Кыргызстандын курама тобу алты упай топтоп экинчи этапка өтүп кетти. Эми кыргызстандык оюнчулар Азиянын эң күчтүү Австралия, Япония, Иран, Кытай жана Кореянын оюнчулары менен беттешке чыгат.
Волейбол боюнча дүйнөлүк чемпионаттын тандоо турунун финалдык бөлүгү Болгария менен Италияда өткөрүлөт.
