Мындан бир нече күн мурда базардын чыга беришинде автоунаанын айдоочу 52 жаштагы аялды тебелетип алып, ал ооруканага жетпей каза болгон. Мындай кырсыктан кийин Ош шаардык мэриясы дуң базардын сатуучуларын соода жайына киргизбей жаткан.
Базардын ээси Нуркул Шырдаков бул базарды ачууга бир топ каражат жумшаганын, эми жагдай төмөнкүчө болуп жаткандыгын айтты.
"Мэриянын өтүнүчү менен көчөдөгү сатуучулар үчүн бул жерди каражатты кредитке 2,8 миллион сом алып базар кылдым эле. Бардык шарттарды түзүп – үстү калкаланган, канализация тарттырып, ажатканаларды салып, 2,5 жылдан бери иштетип жатканбыз. Бул жерди 150гө чукул адам киреге алып иштетип, ай сайын салыгын төгүп турчу элек. Бир нече күн жок болдум эле, базарга автоунаа киргизбейбиз деп жатышат дегенинен келдим. Ушундай жагдай түзүлүп жатыптыр", — деди Нуркул Шырдаков.
Ал эми кишини тебелетип алган факты боюнча кылмыш иши козголуп, айдоочу убактылуу кармоочу жайга эки айга киргизилген.
