БИШКЕК, 25-авг. — Sputnik. Бүгүн таңкы саат 5.00 чамасында 47 жаштагы кыргызстандык Союзбек Салиев өлкөнүн 25 жылдык мааракесине карата дүйнө жүзүн учак менен кыдырып чыгууга аттанды.
Салиев Sputnik Кыргызстан агенттигине билдиргендей, саякат 50 күнгө созулат. Бул убакыт аралыгында саякатчы 46 миң чакырым аралыкты учуп өтүп, май куюу үчүн ар кайсы өлкөгө 20 жолу конот.
Салиев учактын капитаны болсо, 72 жаштагы литвалык Йонас Жукнус учкучтун милдетин аткарат. Эки жаран асман меридианы аркылуу учуп өтөт.
Салиевдин айтымында, Mooney Ovation-2 учагынын узакка чыдашы үчүн Европада кайрадан жабдылган.
"Учак төрт орундуу. Арткы отургучтар алынып, ордуна күйүүчү май алып куюлуучу кошумча бак орнотулган. Бул 4500 чакырым учууга шарт түзөт. Биздин саякаттын эң узак мөөнөтүн Чилиден Пасхи аралына чейинки аралык түзүп, 4000 чакырымга жетет. Биз 4500 метр бийиктикке учабыз. Кошумча кислороддук системабыз бар болгону үчүн алты миң метрден ашык бийиктикке учууга мүмкүнчүлүк бар", — деп билдирди Салиев.
Анын айтымына караганда мындай учак менен башкалар буга чейин жер жүзүн кыдырып чыгышкан. Бул абдан ыңгайлуу жана тез учуучу учак болуп эсептелет.
Саякатчылардын мекенге кайтып келүү мөөнөтү октябрь айынын акырына болжолдонуп жатат.
