БИШКЕК, 16-авг. — Sputnik. Көчмөндөр оюнунун алкагында өтүүчү эл аралык айтышка катыша турган акындарды тандоо аяктаганын уюштуруучулар билдиришти.
Эскерте кетсек, тандоо түрү кечээ, 15-августта болуп, ага 31 акын катышкан. Тандалып отуруп Кырчын жайлоосунда өтө турган айтышка катышчу сегиз акын аныкталды.
"Мында Болот Назаров — 55, Асылбек Маратов — 55, Кадырбек Бейшенов — 55, Чыңгыз Кожошов — 55, Изат Айдаркулова — 53 упай алса, Аалы Туткучев менен Азамат Болгонбаев 51ден, Амантай Кутманалиев менен Жеңишбек Жумакадыр 49дан упай топтошту. Айтышка барчу төкмөлөрдүн саны чектелүү болгондуктан, салтка ылайык сынакка тең упай алгандардын жашы улуусу катышат", — деп айтылат билдирүүдө.
Уюштуруучулар акындардын саны өзгөрүшү мүмкүн экенин, учурда акыркы тактоо иштери жүрүп жатканын кошумчалады.
Х эл аралык айтыш 4-5-сентбярь күндөрү өтөт. Казак-кыргыз акындарына кош байге коюлуп, жалпы байге фонду 1,5 миллион сомду түздү.
