БИШКЕК, 12-авг. — Sputnik. Кыргызстандын ЕАЭБге кирүү алдындагы үмүтүнүн көпчүлүгү акталды. Бул тууралуу КРдин вице-премьери Олег Панкратов Сочиде өтүп жаткан Евразиялык өкмөт аралык кеңештин жыйынында билдирди.
Кыргызстан 2015-жылдын 12-августанда ЕАЭБге мүчө болуп кирген. Анын арты менен кыргыз-казак чек араларындагы көзөмөлдөр алынган.
"Албетте, биздин өзүбүздүн божомолдорубуз бар болчу. Бирок мүчөлүккө кирүү экономикалык каатчылыкка туш келип калды. Буга карабастан, күткөн натыйжалардын көбү жемишин берди", — деди Панкратов.
Ал учурда айрым тоскоолдуктар тууралуу гана сөз болуп жатканын белгиледи.
"Бул тоскоолдуктардын көбү жоюлганын айгинелейт, ветеринардык кызматтын көзөмөлүндө турган товарлардан башкасы эркин сатылып жатат. Эгер биз биримдикке мүчө болбосок, башка көйгөйлөр да жаралмак. Жарандарыбыз өнөктөш мамлекеттердин аймагында ээн-эркин иштеп, билим берүү тууралуу документтерибиз юридикалык күчкө ээ", — деди вице-премьер.
Панкратов гранттык жардамдын негизинде ЕАЭБ эле эмес, Евробиримдик менен Кытайга чыгууга жол ачкан лабораториялар менен башка объектилер курулуп жатканын белгиледи.
