БИШКЕК, 5-июл. — Sputnik. Кыргыз Республикасынын куралдуу күчтөрүнүн Башкы штабы Казакстан генералдарынын уюму менен биргеликте Бишкек шаарындагы Жеңиш аянтында Панфилов дивизиясынын 75 жылдыгына арналган салтанаттуу иш-чара өткөрүштү. Бул тууралуу Башкы штаб билдирди.
Айтылуу Иван Панфиловдун небереси Алуа Байгадамова баштаган казак коноктор КРдин Башкы штабынын өкүлдөрү менен бирге автожүрүштүн башталышында Өчпөс отко гүл коюп, Улуу Ата мекендик согушта курман болгондорду эскеришти.
Панфилов атындагы 8-мотоаткычтар дивизиясынын жетекчиси, полковник Бактыбек Бекболотов митинг-реквиемде согушта эрдик көрсөткөн баатырлар унутулбай турганына токтолду.
"Миңдеген совет аскерлери, анын ичинде кыргыз жигиттери биздин бакубат жашообуз, эркиндигибиз үчүн өз жанынан кечип жасаган эрдигин жаңы муун унутууга акысы жок, ушул автожүрүш курман болгон жоокерлердин эрдигин дагы бир жолу даңазалайт", — деди ал өз сөзүндө.
Автожүрүштүн катышуучулары өз сапарын Кыргызстандын борбор калаасы Бишкектен баштап, Казакстандын Тараз, Чимкент, Астана шаарларын аралап, 12-июль күнү Алматы шаарында салтанаттуу маараке менен аяктайт.
