БИШКЕК, 28-июн. — Sputnik. Москва эл аралык кинофестивалынын "Спектр" программасынын алкагында "Энеге карай жол тарыхый драмасынын бет ачары өттү. Бул тууралуу Новости-Казакстан агенттиги кабарлайт.
Эске сала кетсек, тасмага Казакстан президентинин кызы Алия Назарбаева продюсерлик кылса, Акан Сатаев режиссеру болгон. Ал эми башкы ролду Адиль Ахметов менен Аружан Жазильбекова ойногон.
Анткен менен башкы продюссер Алия Назарбаева тасманын бет ачарына келе алган жок.
"Кинодо камтылган тагдыр өтө жөнөкөй жана жеткиликтүү. Анткени бул окуялар эч кимге чоочун эмес. Жашоодон алынган тасма сиздерди кайдыгер калтырбай, Казакстандын кооз жерлери, каада-салттары өзгөчө таасир калтырат деген ойдомун. Бет ачар аземде сиздер менен бир катарда болбосом да, бул жакта жакшы үмүт менен отурам", — деп жазылат Назарбаеванын кайрылуусунда.
Кинонун Казакстандагы бет ачары 8-сентябрга пландалууда.
Алия Назарбаева Кыргызстандын туңгуч президенти Аскар Акаевдин уулу Айдар Акаевдин мурунку келинчеги болгон. Алар 1998-жылы баш кошуп, үч жылдан кийин ажырашып кетишкен.
