ТЯНЬЦЗИНЬ, 27-июн. — Sputnik. Аалам учурда биргелешкен экономикалык күчкө муктаж экенин Дүйнөлүк экономикалык форумдун президенти Клаус Шваб "Жайкы Давос — 2016" форумунда билдирди.
Белгилей кетсек, учурда Кытайдын Тяньцзинь шаарында дүйнөлүк экономикалык форум өтүп жатат.
Шваб форумга катышкандардын саны жыл сайын өсүп жатканын белгиледи.
"Катышуучулардын саны көбөйүүдө. Бул жолку форумга түрдүү тармакты өнүктүрүп, аны жогорку деңгээлге чыгарган чөйрөнүн өкүлдөрү чогулду. Азыр дүйнө биргелешкен күчкө муктаж, ага бардыгы катышуусу керек. Себеби туруктуу экономиканы калыпка салуу үчүн мамлекеттер бири-бири менен тыгыз байланышкан. Биз дагы ага керектүү шарттарды түзүп, кабыл алышыбыз керек. Инновацияны алдыга жылдыруу зарыл. Ал бардыгына жеткиликтүү болушу кажет", — деди ал.
Форумда сөз сүйлөгөн Кытайдын премьер-министри Ли Кэцян экономикалык жактан кызматташууга Кытай дайыма ачык экенин белгиледи. Ал ошондой эле дүйнөдө экономикалык каатчылыктын башталганына сегиз жыл болуп калганын, өнүккөн жана өнүгүп келе жаткан мамлекеттердин айырмасы абдан чоң экенине токтолду.
Кэцян ошондой эле экономиканы алдыга жылдыруу үчүн инновация менен түзүмдүк реформаларды жүргүзүү керектигин айтап, ар бир мамлекеттин экономикалык абалы түрдүү болсо дагы алардын алган багыты бир болуп инновациялык аракеттерди колдоосу зарыл экенин белгиледи.
Ал экономикалык өнүгүү жагынан Кытай дүйнөдө экинчи орунда турарын кошумчалады.
