ТЯНЬЦЗИНЬ, 27-июн. — Sputnik. Премьер-министр Сооронбай Жээнбеков баштаган кыргыз делегациясы Кытайдын Тяньцзинь шаарында өтүп жаткан Дүйнөлүк "Жайкы Давос — 2016" экономикалык форумуна катышууда. Бул иш чара 28-июнга чейин созулат.
Анын алкагында кыргызстандык делегация Кытайдын премьер-министри Ли Кэцян менен жана Дүйнөлүк экономикалык форумдун президенти Клаус Шваб менен эки тараптуу жолугушууларды өткөрөт.
"Жайкы Давос" 2007-жылдан бери жыл сайын өтүп келет.
Экономикалык форумга 90 мамлекеттен өкүлдөр келген. Иш-чарага Кыргызстан, Түштүк Корея жана Кытай мамлекеттеринин премьер-министрлери катышууда.
Кыргызстандык делегациянын курамында премьер-министр Сооронбай Жээнбеков, тышкы иштер министри Эрлан Абдылдаев, КРдин Кытайдагы элчиси Канайым Бактыгулова, Бишкек шаар мэри Албек Ибраимов, КР өкмөтүнүн эл аралык кызматташуу бөлүмүнүн башчысы Айбек Айдарбеков жана экономика министринин орун басары Алмаз Сазбаков бар.
