БИШКЕК, 24- июн. — Sputnik. Бишкекте күйүп жаткан 12 кабаттуу үйдөн чыккан өрт четтетилди. Бул тууралуу Sputnik Кыргызстан агенттигине өзгөчө кырдаалдар министрлиги билдирди.
Эскерте кетсек, бүгүн кечинде Панфилов менен Фрунзе көчөлөрүнүн кесилишинде жайгашкан 12 кабаттуу үйдө өрт чыгып, жогорку кабаттары, жалпы жонунан 1000 чарчы метр аянт күйүп жатат. Имараттын айланасы тосулуп, 50гө чукул милициянын кызматкери жүрөт. Аталган райондо газ жана электр энергиясын берүү токтотулган.
"Өрттүн очогу өчүрүлдү. Ушу тапта калган жерлердеги өрттү өчүрүү аракеттери көрүлүп жатат", — деп айтылат билдирүүдө.
Бишкектин мэри Албек Ибраимовдун айтымында, үйдөн бардык жашоочулар эвакуацияланды, алардын баары курулушчулар экени аныкталган. Имарат азырынча пайдаланууга бериле электиги маалым болду.
