БИШКЕК, 23-июн. — Sputnik. Өрт чыккан көп кабаттуу үйдө жашоочулардын калып калбаганын куткаруучулар текшерип жатканын Бишкек шаарынын мэри Албек Ибраимов Sputnik Кыргызстан агенттигинин кабарчысына билдирди.
Панфилов жана Фрунзе көчөлөрүнүн кесилишинде 12 кабаттуу үйдүн чатыры өрттөнүп, кырсык болгон жерде 10 өрт өчүрүүчү машина иштеп жатат. Кырсык болгон аймак милиция кызматкерлери тарабынан курчоого алынган.
"Бардык жашоочулар сыртка чыгарылды. Азыр ар бир кабатты текшерип, кишилердин калып калбаганын карап жатабыз", — дейт шаар мэри.
Бул имаратты Borsan Construction компаниясы салганын билдирди.
"Үйгө жашоочулар жарым жартылай көчүп келишкен. Канча жшоочу бар экенин так айта албайбыз. Имаратты толук колдонууга бере элек болчубуз", — деп компаниянын менеджери Элдияр Шайлообек уулу маалымдады.
Аталган аймакта электр эенргиясы менен газ атайын кызмат тарабынан өчүрүлгөн.
