Каньон аска-таштуу ландшафтынан улам ушундай аталышка ээ болгон. Аска-таштардын арасынан түрдүү жаныбарлардын образын көрүүгө болот. Андан тышкары Египеттеги атактуу сфинксти, Улуу Кытай сепилин дагы окшоштуруп тапсаңыз болот. Бул жомоктун баары шамал, жаан жана күндөн улам пайда болгон.
Бул аймакка жакын жашаган тургундардын айтымында, "Жомок" каньонундагы пейзаждар дайыма жаңырып турат. Биринчи күнкү көрүнүш экинчи кайталанбайт. Бул аймакка тийген күндүн нуру дагы аны көркүнө чыгарып, бир күн ичинде эле бир нече түскө боёп, чынында эле ажайып кооз жер экенин даана далилдеп турат.
Каньон Ысык-Көлдүн түштүк жээгинде жайгашып, Терскей-Ала-Тоо кыркасында Кажы-Сай менен Тамга айылдарынын ортосунда жайгашкан.
Бишкектен каньонго чейинки аралык 270 чакырымды түзөт.
Ролик "Ажайып Кыргызстан" долбоорунун алкагында тартылган. Ал Sputnik Кыргызстан маалымат агенттиги жана радиосунун демилгеси менен Тарых жана маданият жылын өткөрүү боюнча мамлекеттик дирекциянын колдоосунда ишке ашып жатат.
