БИШКЕК, 22-июн. — Sputnik. Бокс боюнча Кыргызстандын курама тобу Рио-де-Жанейродо өтө турган Олимпиадага лицензия ала албай калды.
Бакуда өткөн (Азербайжан) лицензиялык турнирдин жыйынтыктары бокс боюнча эл аралык ассоциациянын расмий сайтына жарыяланды.
Кыргызстандык сегиз боксчу, анын ичинде Азиянын чемпиону Азат Үсөналиев баш болуп 16-25-июнь аралыгында өткөн турнирдеги биринчи беттеште жеңилип калышты.
Лицензияга ээ болуу үчүн спортчулар өз салмак категориясында алдыңкы үч сапка илинүүлөрү керек эле.
Рио-де-Жанейродо өтө турган бокс боюнча Олимпиадага Кыргызстандын атынан Эркин Адылбек уулу гана бара турган болду. Ал Кытайда өткөн Азия лицензиялык турниринде 81 килограмм салмактагы спортчулар арасында алдыңкы үч орунга илинген.
Азербайжандын борборунда өтүп жаткан турнир Олимпиадалык оюндардын алдындагы акыркы турнир болуп эсептелет. Анда 10 түрлүү салмактык категорияда 39 жолдомо ойнотулган.
