БИШКЕК, 22-июн. — Sputnik. Арсланбаптын жаңгактары туристтер үчүн эң мыкты продукт болуп бере тургандыгын Туризм департаментинин жетекчиси Азамат Жаманкулов Facebook тармагындагы баракчасына жазып чыкты.
Аны айтымында, Александр Македонский аскерлери менен Согдианага баратып Арсланбапга кайрыла кеткен.
"Ал жердин кооздугуна жана касиетине ушунчалык суктанып, өзү менен кошо көптөгөн жаңгактын жемишин алып кеткен экен. Ошентип Грецияда жаңгак токойлору пайда болгон. Азыркы учурда дүйнө аны грек жаңгагы деп билет, бирок мен анын мекени Кыргызстан экенине ишенем", — деп белгиледи Жаманкулов.
Ошону менен катар департаменттин жетекчиси туристтерге жогорку деңгээлдеги шарттарды түзүү үчүн инфраструктуранын түзүлүшү, токойдун аймагында жайгашкан пансионаттарды жаңылоо, жаңы объектилерди куруу үчүн инвестиция тартуу сыяктуу жаңы заманбап долбоорлорду ишке ашыруу маселелерин чечүү керек экенин кошумчалады.
