БИШКЕК, 8-июн. — Sputnik. Газ ташуучу автоунаанын жарылышынан жабыркаган бир киши каза болгонун Травматология жана ортопедия илим изилдөө борборунун башкы дарыгери Алмазбек Кубатбеков билдирди.
Анын айтымында, каза болгон жаран 26 жашта.
"Анын терисинин дээрлик 100 пайызы күйүп калган болчу", — деди дарыгер.
Ал ошондой эле калган беш бейтаптын абалы оор бойдон экенин кошумчалады.
Белгилей кетсек, 6-июнда кечинде газ ташуучу автоунаа жарылып, андан жалпысынан 11 киши жабыркап, алтоо оор абалда ооруканага жеткирилген.
Буга чейин саламаттык сактоо министри Талант Батыралиев, Бишкек улуттук травматология жана ортопедия институтунун жетекчиси Сабырбек Жумабеков денеси күйүп калгандарга көп кан керектигин билдиришкен.
