БИШКЕК, 4-июн. — Sputnik. Белгилүү мушкер Мухаммед Али (чыныгы аты Кассиус Клей) Американын Финикс шаарында каза болду. Ал 2-июнда дем алуусу начарлап, ооруканага жаткырылган.
Sputnik Кыргызстан агенттиги атактуу мушкер спорт карьерасында атаандаштарын нокаут менен жеңген учурларды сунуштайт.
Сонни Листон менен болгон беттеш
1965-жылы 25-майда Али атаандашы америкалык мушкер Сонни Листонду биринчи раундда эле нокаутка чаап, дүйнөнүн абсолюттук чемпиону болгон. Бул мелдеште Кассиус Клей Мухаммед Али деген жаңы ат менен чыккан.
Брайан Лондон менен болгон беттеш
Беттеш 1966-жылы 6-августта болгон. Ал англиялык атаандашын үчүнчү раундда жеңип алган.
Карл Мильденбергер менен болгон беттеш
Ушул эле жылы 10-сентябрда немис мушкери Мильденбергерге каршы чыккан. Али атаандашын 5чи, 8чи жана 10-раунддарда нокдаунга кулаткан. 6-раундда немис мушкеринин сол көзүнүн үстү канаган. Калыс 12-раундда беттешти токтотуп, техникалык нокаут менен Алини жеңүүчү деп атаган.
Зора Фоли менен болгон беттеш
Америкалык мушкер Зора Фоли менен 1976-жылы 22-мартта мушташкан. Ал атаандашын 7-раундда нокаутка чаап, WBA World версиясы боюнча дүйнө чемпиону статусун сактап калган.
Жордж Форман менен болгон беттеш
Али атаандашы менен 1971-жылы 30-октябрда беттешкен. Бул беттеш анын карьерасындагы эң маанилүү кармаш болгон. "Ринг" журналы бул беттешти жылдын беттеши деп атаган. Али атаандашын 8-раундда нокаутка чаап, 5 миллион доллар гонорар алган. Ошентип белгилүү мушкер WBC жана WBA World версиялары боюнча дүйнө чемпиондугун сактап калган.
