БИШКЕК, 2-июн. — Sputnik. Мамлекеттик ипотека алган 25 адамдын аты-жөнү ушу кезге чейин белгисиз. Бул тууралуу депутат Мирлан Жээнчороев парламенттеги ар кандай маселелер каралып жатканда билдирди.
Ал насыя үчүн миллиондогон каражат каралганы менен бүгүнкү күндө аны 25 гана адам алганына нааразы болду.
"Ушул күнгө чейин 100 гана адам насыя алуу үчүн каттоодон өткөн. Алардын 25и акча алышыптыр. Биз ушул 25 адам үчүн офис ачып, элге айлык төлөп жатабызбы?" — деди депутат.
Жээнчороевдин айтымында, насыя алгандардын тизмеси ачыкка чыкпай келет.
"Насыя алгандар бирөө жарымдын тууган-туушканы болуп чыкпасын деп тизмесин сурагам. Бирок ал тизмени бербестен купуя кат жөнөтүп жатышат", — деп кошумчалады депутат.
Жээнчороев өкмөт өкүлдөрүн таза иштөөгө чакырды.
Буга чейин мамлекеттик ипотекалык компания "Жеткиликтүү турак жай" программасынын негизинде 21 кыргызстандык жаранга ипотекалык насыя берилгенин билдирген.
Ипотекалык насыялар төмөнкү шарттар менен берилет: максималдуу сумма— 3 миллион сом, пайыздык чен — 12-14 пайыз, төлөө мөөнөтү — 15 жылга чейин, жеткиликтүү аянты — батирлер үчүн 70 метр квадрат болсо жер үйлөр 150 метр квадратка чейин болуусу керек.
