БИШКЕК, 1-июн. — Sputnik. Президент Алмазбек Атамбаев Улуттук онкология борборуна барып, балдардын онкология жана гемотология бөлүмүнө беш миллион сомдук сертификат тапшырды. Бул тууралуу өлкө башчынын маалымат кызматы билдирди.
Президент балдар дарыланып жаткан оорукананын абалы менен таанышып, палаталарга кирип, балдардын ата-энелери менен баарлашты.
"Эң башкысы — балдар оорубасын. Бул жөнүндө ар бир ата-эне тиленет. Балаңдын ооруганын көргөнчө өзүңдүн ооруганың жакшы. Биздин бактыбыз балдардын ден соолугу менен байланыштуу", — деди Атамбаев.
Өлкө башчы сертификатты улуттук борбордун жетекчисинин милдетин аткаруучу Бактыгүл Султангазиевага тапшырды. Президентти жубайы Раиса Атамбаева менен саламаттык сактоо министри Талантбек Батыралиев коштоп жүрдү.
