БИШКЕК, 31-май — Sputnik. Чек араны бузган 10го чукул адам Өзбекстандын жарандары болушу ыктымал. Бул тууралуу Sputnik Кыргызстан агенттигине Мамлекеттик чек ара кызматынын жетекчиси Абдикарим Алимбаев билдирди.
Окуя 31-майга караган түнү Баткен облусундагы мамлекеттик чек ара аймагына жакын "Пионерь лагерь" аймагында болгон. Чек ара нөөмөтчүлөрү мамлекеттик чек арага жакындаган 10го чукул адамды байкаган. "Токто" деген талапка баш ийбегенден кийин, эскертүү иретинде асманга ок атышкан. Ушундан кийин гана белгисиз адамдар Өзбекстанды көздөй кирип кеткен.
"Чек араны бузган жарандардын өздүгүн тактоо үчүн Өзбектсандын чек ара кызматына билдирме жибердик. Биздеги маалыматка ылайык, алар өзбек жарандары болгон", — деп билдирди чек ара кызматынын жетекчиси.
Алимбаевдин айтымында, аларды контрабандачылар деп атоого али эрте.
