ЧОЛПОН-АТА, 14-май — Sputnik. Чолпон-Атада бешинчи эл аралык "Run The Silk Road" марафону өтүп жатат.
Ага катышып жаткан 1800 спортчу Кыргызстандын аймагынан тышкары Казакстан, Япония, Англия жана башка мамлекеттерден келген.
Марафон өткөрүү үчүн Чолпон-Ата — Корумду унаа жолунун 20 чакырымы тосулган. Спортчулар А пунктунан Б пунктуна чейин жана кайра артка чуркашат.
Марафонго профессионал спортчулар менен бирге спорт сүйүүчүлөр да катышып жатат. Жеңүүчүлөргө акчалай сыйлык ыйгарылмакчы. Марафондогу биринчи орун үчүн уюштуруучулар миң доллар берсе, жарым марафонду жеңген адам 300 доллар менен сыйланат.
Эл аралык "Run The Silk Road" марафону быйыл бешинчи ирет өтүүдө. Иш-чара олимпиада оюндарында байгелүү орунга ээ болгон кыргызстандык жөө күлүк Сатымкул Жуманазаровдун жаркын элесине арналат.
