БИШКЕК, 24-апр. — Sputnik. Кыргызстандык "Курманжан датка" менен "Асман алдында" тасмалары Индияда өткөн эл аралык кинофестивалдан байгелүү кайтканын "Айтыш-фильм" киностудиясынын маалымат катчысы Чолпон Идрисова билдирди.
"Алтын үч бурчтук" деп аталган фестиваль Бхубенешвара шаарында 21-23-апрель күндөрү болду. Анда Садык Шер-Нияздын "Курманжан датка" жана Дальмира Тилепбергенованын "Асман алдында" тасмалары көрсөтүлдү.
Идрисованын айтымында, Кыргызстандын өкүлү актер Анвар Осмоналиев эки байге менен келет. Биринчиси "Курманжан датка" үчүн болсо, экинчисин "эркектин мыкты ролу" номинациясында өзүнө берилген сыйлык. Осмоналиев "Асман алдында" тасмасында башкы каармандын образын жараткан.
"Асман алдында" — сүйүү, жоготуу, ишеним тууралуу тартылган тасма. Ал эми "Курманжан датка" — Алай канышасы жашоосун чагылдырган тарыхый драма.
