БИШКЕК, 30-мар. — Sputnik. Бүгүн "Жеткиликтүү турак жай 2015-2020" программасынын алкагында Токмок шаарында биринчи жолу ипотекалык насыя бериле турганын Мамлекеттик ипотекалык компания билдирди.
Маалыматка ылайык, биринчи болуп насыя Бакеев деген Токмок аймактык оорукананын дарыгери алмай болду.
Каражат өнөктөш банктар аркылуу 15 жылдык мөөнөт менен берилет. Насыянын үстөгү 12-14 пайызды түзөт. Ипотеканы 21 жаштан 65 жашка чейин жарандар алып, күрөөгө жаңы сатып алынган турак жай коюлат. Ал милдеттүү түрдө камсыздандырылышы шарт.
Талап боюнча алына турган батирдин аянты 70 чарчы метрден, ал эми жер үйдүкү 150 чарчы метрден ашпашы керек.
Мындан беш күн мурун Мамлекеттик ипотекалык компания Ош жана Жалал-Абад облус тургундарына биринчи жолу насыя берди.
