БИШКЕК, 25-мар. — Sputnik. Улуттук банк тарабынан 2397 жарандын ипотекалык насыясы трансформацияланды. Бул тууралуу президент Алмазбек Атамбаев аталган мекеменин башчысы Толкунбек Абдыгуловду кабыл алуу учурунда белгилүү болду.
Улуттук банк төрагасынын айтымында, президенттин тапшырмасынын негизинде трансформацияланган насыянын суммасы 2 миллиард 163 миллион сомду түздү.
Мындан тышкары, Абдыгулов мамлекет башчысына башкы банктын өлкөдө макроэкономикалык туруктуулукту камсыздоо боюнча жасап жаткан иштери тууралуу айтып берди.
Президент Улуттук банк кыргыз валютасын колдоо, банк жана төлөм системасынын натыйжалуулугун, коопсуздугун гана эмес, дыйкандардын арзан насыялык ресурстарга жеткиликтүүлүгүн да камсыздашы керектигин белгиледи.
