БИШКЕК, 24-мар. — Sputnik. Май айында бешинчи эл аралык "Run the Silk Road" марафону өтө турганы иш-чаранын расмий сайтында жарыяланган.
Жеңил атлет, Москвада өткөн Олимпиада оюндарынын жеңүүчүсү Сатымкул Жуманазаровдун элесине арналган марафон 14-май күнү Ысык-Көл облусундагы Бостери айылында өтөт. Иш-чараны "Эл аралык марафон дирекциясы" коомдук бирикмеси Мамлекеттик жаштар иши, дене тарбия жана спорт агенттигинин жана бир катар федерациялардын колдоосу менен уюштуруп жатат.
Марафонго жергиликтүү жана чет элдик спортчулар катышып, төмөнкүдөй аралыкта күч сынаша алат:
- 42 чакырым 195 метр (марафон), 18 жаштан жогору;
- 21 чакырым 97 метр (жарым марафон), 18 жаштан жогору;
- 10 чакырым, 16 жаштан жогору;
- 5 чакырым (басуу жана чуркоо), бардык каалоочулар.
