БИШКЕК, 19-мар. — Sputnik. Кыргыз-өзбек чек арасындагы көзөмөл өткөрүү жайлары ачыла электигин Чек ара кызматы билдирди.
Маалыматка ылайык, эки мамлекеттин чек арасындагы абалда чечүүдө азырынча жылыш жок. Чек ара бөлүмдөрүнүн аракеттерин жөнгө салуу үчүн окуя болгон жерге КР Мамлекеттик чек ара кызматынын төрагасы Таалайбек Усубалиев келди.
Чек ара кызматынын бөлүмдөрү кыргыз-өзбек чек арасын күчөтүлгөн режимде кайтарып жатканы билдирүүдө айтылат.
КР Чек ара кызматы өзбек тарапка буга чейин жетишилген келишимдерге карабастан өз аскерлерин такталбаган чек арага киргизгени боюнча билдирүү жөнөткөн. Билдирүүдө мамлекеттик чек арадагы абалды курчутпоо үчүн Чаласарт аймагына коюлган аскерлерди алуу керектиги айтылган.
"Учурда кыргыз-өзбек чек арасындагы "Кызыл-Кыя" көзөмөл өткөрүү жайынан башка бардык көзөмөл өткөрүү жайлары жабык. Ал эми эки мамлекеттин чек арасындагы эл аралык көзөмөл өткөрүү пунктары башка мамлекеттин жарандары үчүн кадимки режимде иштеп жатат", — деп айтылат билдирүүдө.
Буга чейин Өзбекстандын Улуттук коопсуздук кызматынын Чек ара комитети Нооруз майрамына көрүлгөн даярдыктан улам, чек араларын бир тараптуу бекемдегенин билдирген. КРдин Тышкы иштер министрлиги Өзбекстанга чек арадагы блок-постторду алуу боюнча нота жөнөткөн.
