БИШКЕК, 18-мар. — Sputnik. Москвалык аялды өлүмдөн алып калган кыргызстандык Марат Исаевге Россиянын муфтийлер кеңешинин төрагасы шейх Равил Гайнутдиновдун атынан баалуу белек жана ыраазычылык кат тапшырылды. Бул тууралуу Россия мусулмандарынын дин башкармалыгы билдирди.
Маалыматка ылайык, сыйлык тапшыруу аземи мечитте жума намазынын алдында өттү. Исаевге белектерди Москванын муфтийи Илдар Аляутдинов намазга келген миңдеген мусулмандардын көз алдында тапшырды.
Эскерте кетсек, Москвада иштеп жүргөн Исаев 11-февралда "Красносельская" станциясында эс-учун жоготуп темир жолго кулап түшкөн аялды полиция кызматкери менен сактап калган.
Бул эрдиги үчүн Исаевге Кыргызстандын президенти Алмазбек Атамбаев да, Россиянын өлкө башчысы Владимир Путин да ыраазычылык билдирип, сыйлык тапшырышкан.
