БИШКЕК, 15-мар. — Sputnik. Тышкы иштер министрлиги Кыргызстандын эл аралык келишимдерин электрондук архивге өткөрө баштаганын аталган мекеме билдирди.
Электрондук архивдөө маселеси былтыр жай айында ТИМдин коллегиялык жыйынында премьер-министр Темир Сариевдин катышуусунда талкууланган. Аны ишке киргизүү министрликтин архивиндеги эл аралык келишимдердин тексттик варианттарынын сакталышын камсыздоо муктаждыгынан улам келип чыккан.
Мында архивдеги кагаз документтердин көлөмү менен учурдагы абалы эске алынып, электрондук архивге киргизүүнүн технологиялары иштелип чыгып, аларды маалымат базасында сактоонун программасы түзүлгөн.
Андан сырткары, министрлик документтерди сканерлөө жана архивдөөчү аппарат сатып алган.
